Vitore Tusha, kandidate për presidente

Emri më shumë i mundshëm për të qenë kryetarja e re e shtetit dhe për herë të parë një presidente grua në Shqipëri, është ai i Vitore Tushës, një propozim direkt nga Partia Socialiste dhe që po gjen përkrahje dhe nga mazhoranca.

Emri i Vitore Tusha po diskutohet në këtë takim të së dielës ku marrin pjesë kryeministri Sali Berisha, kryetari i PS, Edi Rama, kreu i Grupit Parlamentar të PD, Astrit Patozi, i Grupit Parlamentar të PS, Gramoz Ruçi, kryetari i LSI, Ilir Meta dhe kreu i PDIU, Shpëtim Idrizi, ky i fundit, përkrahës publikisht i kandidaturës së Fatos Nanos.

Interesant është fakti se në vitin 2008 kur Presidenti i Republikës, Bamir Topi i dorëzoi gjatë një ceremonie të veçantë të zhvilluar në Presidencë, dekretin e emërimit anëtares së re të Gjykatës Kushtetuese, Vitore Tusha, pjesëmarrja ishte e gjerë nga të gjitha palët politike.

Në këtë ceremoni merrnin pjesë dy nënkryetarët e Kuvendit, Fatos Beja dheYlli Bufi, Enkelejd Alibeaj, atëherë Ministër i Drejtësisë; Thimio Kondi, Kryetar i Gjykatës së Lartë; Ermir Dobjani, atëherë Avokat i Popullit; Ina Rama, Prokurore e Përgjithshme; Ardjan Fullani, Guvernator i Bankës së Shqipërisë; Robert Çeku, atëherë kryetar i Kontrollit të Lartë të Shtetit dhe Fatmira Laska, atëherë kryetare e Inspektoratit të Lartë të Deklarimit dhe Kontrollit të Pasurive. Gjithashtu ishin të pranishëm edhe anëtarët e Gjykatës Kushtetuese: kryetari z. Vladimir Kristo, Xhezair Zaganori, Gjergji Sauli, Fehmi Abdiu, Kujtim Puto, Petrit Plloçi, Sokol Sadushi dhe Sokol Berberi.

Sakaq, sot u spekulua dhe për katër emra të propozuar direkt nga mazhoranca, ministri i Brendshëm Bujar Nishani, ai i Mbrojtjes, Arben Imami analisti Artan Hoxha, Petraq Milo. (NOA/INA)