Artan Hoxha do të kërkojë drejtësi për akuzat kundër tij

Ish-kandidati për President, Artan Hoxha, me anë të një mesazhi publikuar në faqen e tij personale në rrjetin social “Facebook”, bëri të ditur se akuzën e bërë ndaj tij si ish-bashkëpunëtor i Sigurimit të Shtetit do ta ndjekë ligjërisht. 

“Do ta ndjek si qytetar i thjeshtë. Vetë, me durim, hap pas hapi në rrugë ligjore gërshetuar me komunikimin publik. Në radhë të parë akuzën më të ndyrë, atë të bashkëpunëtorit me Sigurimin e Shtetit por edhe të tjerat. Balten dhe baltosësit nuk i neglizhoj më siç kam bërë deri më sot”, - është shprehur ai. 

Artan Hoxha, një nga ekspertët e mirënjohur të ekonomisë dhe President i Institutit të Studimeve Bashkëkohore (ISB) në Tiranë ishte kandidati për president i propozuar nga maxhoranca, mirëpo ai u tërhoq nga gara vetëm disa orë para votimit, për shkak të sulmeve kundër tij. (INA)