Topi: Rama një amator në politikë

Presidenti në largim Bamir Topi dënoi ashpër sot ndryshime kushtetuese për zgjedhjen e Presidentit. 

Ai i ka cilësuar ato si ndryshime që shkuan në favor të autoritarizmit të dy personave, kryetarit të PD-së, dhe atij të PS-së, ndërsa akuzoi Ramën se u soll si amator në këtë proces. I pyetur për zgjedhjen e presidentit Nishani, në emisionin televiziv, ‘Tonight’ nga Ilva Tare, Topi tha se gjate këtij procesi “nga njëra anë ishte një njeri me eksperiencë, dhe nga ana tjetër një amatorizëm politik. Ata erdhën me moton, ‘O i fitoj të gjitha o i humb të gjitha’”. 

I pyetur se kush u tregua amator në këtë rast, Topi u përgjigj se i tillë ishte kreu i PS, Rama, transmeton BW. 

“Unë jam shumë i qartë, nuk fshihem pas frazave. Nëse unë dua të them e them, nëse në atë përballje ka pasur një predispozicion, kishim përballë, një njeri me karrierë të gjatë në politikë nga ana tjetër, një njeri për fat të keq, tregoi një amatorizëm të theksuar politikë. Unë e kam thënë disa herë këtë. Unë kam tentuar t’i paralajmëroj. Unë nuk kam fyer njëri, kam gjetur gjuhën e argumentit”. 

Lidhur me presidentin e zgjedhur, Bujar Nishani, Presidenti në detyrë u shpreh se e vlerëson figurën e tij. “Unë kam një njohje relativisht të vjetër, 11 vite dhe me Nishanin vazhdimisht kam patur një komunikim korrekt, në disa pozicione, edhe në rolin e Presidentit me ministrin e Drejtësisë. Një figurë që i ka shanset për ta administruar mirë atë pozicion.” 

Presidenti në largim Bamir Topi theksoi se pas mbarimit të mandatit presidencial më 24 Korrik, do të rikthehet në politikë si misionar. Ai tha se nuk ka asnjë kuriozitet e qellim për të bërë karrierë politike. (INA)