Greqia projekt për minoritetin grek në Shqipëri

Edhe pse e mbërthyer nga kriza e rëndë ekonomike, Greqia sërish nuk lë pas dore minoritetin grek në Shqipëri, teksa vetëm pak ditë më parë ka publikuar njoftimin për hapjen e një tenderi me vlerë 45 mijë euro, i cili ka në qendër të tij mbledhjen e të gjitha të dhënave historike, kulturore e gjeografike të minoritetit etnik grek në Shqipëri në një regjistër elektronik. Ka qenë Ministria e Jashtme Greke, e cila, tri ditë më parë ka publikuar në faqen e saj të internetit njoftimin për zhvillimin e këtij tenderi, si dhe ka publikuar aty dokumentet që shpjegonin me hollësi të gjitha kërkesat e Ministrisë për fituesit e tenderit. Por ndërkaq, vetëm 48 orë pas publikimit, në mënyrë ende të pashpjegueshme, ky njoftim është hequr nga faqja zyrtare e Ministrisë së Jashtme Greke. 

Referuar dokumenteve të Ministrisë së Jashtme Greke, të cilat “Gazeta Shqiptare” i disponon, bëhet e ditur se tenderi në fjalë, me vlerë rreth 45 mijë euro, ka si objekt të tij krijimin e të dhënave dixhitale të interesit historik, social dhe kulturor për minoritetin etnik grek që jeton në Shqipëri. Pas publikimit të tenderit, Ministria e Jashtme është duke pritur të gjitha dosjet e kompanive të interesuara për të realizuar këtë projekt, të cilat do të kenë në dispozicion një vit për përfundimin e tij. (GSH/INA)