Kapet rrjeti ballkanas i trafikimit të emigrantëve, mes tyre 8 shqiptarë

Në një aksion policor ndërkombëtar në Kroaci u zbulua rrjeti ndërkombëtarë i trafikimit të qenieve njerëzore, kryesisht emigrantëve që nga Turqia transportoheshin në vendet e BE-së.

Policia kroate ka bërë të ditur se në operacionin e koduar “Loca” është kapur rrjeti i trafikantëve i përbërë prej 21 vetave, 6 prej të cilëve janë nga Kroacia, 8 nga Shqipëria, 3 nga Bosnja dhe nga 2 trafikantë nga Sllovenia dhe Turqia.

Çmimi për trafikimin e emigrantëve shkonte prej 700 deri në 1.200 euro, ndërsa dyshohet se trafikantët deri tani kanë trafikuar mbi 100 veta në 30 raste, duke organizuar transportin e tyre ilegal përmes rrugës së njohur “Rruga e Ballkanit”.

Hetimi i këtij rrjeti të trafikimit ka nisur nga tetori i vitit 2011, ku në operacion ishin kyçur policitë e rajonit dhe vendeve të BE-së. Organizatorët shfrytëzonin disa rrugë dhe variante për të transportuar emigrantët. (INA)