Otranto, kapen dy skafistët shqiptarë me 250 kg drogë

Një sasi e madhe droge është sekuestruar dhe poseduesit e saj, të cilit ishin dy shtetas shqiptarë janë arrestuar nga policia italiane. Siç raporton “Shekulli”, operacioni u krye me sukses nga Guardia di Finanza e Brindisit, ku gjatë natës së djeshme ka sekuestruar 250 kg marijuanë dhe ka arrestuar dy skafistë shqiptarë, 32 dhe 25 vjeç, të dy nga Durrësi, që akuzohen për trafik ndërkombëtar të drogës. Autoritetet italiane kanë bllokuar gjithashtu edhe motoskafin e përdorur për trafikun e lëndëve narkotike. 

Mësohet se një avion i koordinuar nga Grupi Aerodetar i Guardia di Finanza në Taranto, gjatë kontrolleve mbi Kanalin e Otranto-s, pak para mesnatës se ka zbuluar një motoskaf të gjatë rreth 6 metra, që po lundronte me drita të fikura drejt brigjeve italiane. 

Mjeti lundrues është ndjekur nga avioni dhe më pas nga një helikopter i të njëjtit grup deri sa hyri të ujërat territoriale italiane. Në atë moment, anijet e Guardia di Finanza-s së Brindisi-t, që kishin ndjekur në radar lëvizjet, i janë afruar dhe kanë bllokuar motoskafin, duke gjetur në bord shumë pako me marijuanë dhe dy skafistë të cilët, kur kuptuan që s’kishin nga t’ia mbanin, tentuan që të mbysnin mjetin.

Operacioni është zhvilluar 35 milje larg brigjeve të Brindisi-t. Droga - sipas hetuesve - pasi të ishte hedhur në treg do të sillte një fitim prej rreth 2 milionë eurosh.

Që nga fillimi i vitit Guardia di Finanza ka sekuestruar përgjatë brigjeve puljeze rreth 4700 kg lëndë narkotike dhe 6 motoskafë, ndërsa ka arrestuar 7 skafistë shqiptarë. (INA)