PD: Rama po bllokon imunitetin

Zëdhënësja e Partisë Demokratike, Silvi Bardhi në një konferencë për shtyp deklaroi se kreu i Partisë Socialiste, Edi Rama po bllokon imunitetin, duke mos lejuar grupin e PS të votojë.

“Kryetari  i Partisë Socialiste Edi Rama në kundërshtim me interesin jetik të çdo qytetari shqiptar për heqjen e imunitetit për zyrtarët e vendit, deklaron çdo ditë se do të bllokojë këtë akt historik dhe nuk do të lejojë grupin e tij të votojë më datën 6 Gusht heqjen apo kufizimin e imunitetit”, dekaloi zëdhënësja Bardhi.

Sipas saj, me bllokimin e heqjes së imunitetit dhe të rrëzimit të murit të korrupsionit, Rama u thotë troç 560 mijë pensionistëve dhe mbi 100 mijë familjeve në ndihmë ekonomike se për atë dhe partinë e tij, rëndësi kapitale ka mbrojtja me imunitet i miliarderëve të Kryesisë së partisë së tij dhe jo rritja më e madhe e ndihmës së  tyre ekonomike apo pensioneve të tyre të ulëta apo shtimi i ilaçeve të nevojshme për shëndetin e tyre në listën e rimbursimit.
 
“Me këtë qëndrim z. Rama deklaron se muri i imunitetit që është dhe muri i korrupsionit, mburoja e zezë ligjore që klub miliarderësh të Partisë Socialiste dhe zyrtarët e tjerë përdorin për të grabitur çdo ditë pasuritë e qytetarëve shqiptarë pa iu hyrë ferra në këmbë, do të mbrohet prej tij. Me këtë qëndrim z. Rama iu thotë qytetarëve të papunë se për atë dhe partinë e tij nuk ka asnjë rëndësi shembja e murit të korrupsionit që shkatërron çdo ditë vende pune dhe pengon krijimin e vendeve të reja, por rëndësi ka, pasurimin e paligjshëm, me pallate pa leje në bashkitë e tij, larja e parave të trafiqeve kriminale, fshehjes së taksave dhe kontrabanda në dogana nga klubi i miliarderëve në krye të Partisë Socialiste të cilët janë gati të dorëzojnë çdo gjë tjetër por Jo imunitetin që e kanë cituar e blerë me milliona Euro”, u shpreh Bardhi. (INA)