Kuvendi shqiptar sot seancë pë imunitetin

Pas vitesh, muajsh e ditëve të tëra me debat e replika, në seancën e sotme parlamentare pritet të jepet vota e cila përcakton nëse zyrtarët tanë do jenë të veshur me imunitet apo do e heqin atë.

Ndërsa Partia Demokratike, Lëvizja Socialiste për Integrim dhe faktori ndërkombëtar bëjnë apel ndaj Partisë Socialiste për bashkim votash për heqjen e imunitetit, kjo parti deri në momentet e fundit është shprehur se vota e saj do jetë kundër.

Në argumentin e Partisë Socialiste siç informon noa.al, theksohet se nuk është kundër heqjes së imunitetit por se meqenëse këto ndryshime bëhen në Kushtetutë, atëherë duhen bërë edhe ndryshimet e plota në të që lidhen edhe me emërimet e gjyqtarëve të Gjykatës së Lartë apo të asaj Kushtetuese.

Gjithsesi para seancës që është parashikuar të mblidhet në orën 10.00 të paradites së sotme, Partia Socialiste mbledh grupin e saj parlamentar për të vendosur ecurinë në seancën e sotme.

Paraprakisht nga selia rozë bëhet e ditur se grupi parlamentar i saj do jetë në parlament, do diskutojnë por në momentin e votimit për ligjin për heqjen e imunitetit nuk do marrin pjesë.

Konsensusi i munguar mes PD dhe PS rrezikon seriozisht votimin e këtij ligji, i cilësuar si kyç për marrjen e statusit të vendit kandidat drejt Bashkimit Europian. (NOA/INA)