Shqipëria e rrezikuar nga zjarret

Shqipëria rrezikohet ekstremisht nga zjarret. Vatrat e zjarrit kanë përfshirë veriun e Shqipërisë dhe pjesën juglindore të vendit. Zonat më problematike janë Dibra, Kukësi, Puka, Tropoja, Librazhdi, Korça, Pogradeci, Vlora, Saranda, Tepelena dhe Gjirokastra.

“Prej 2-3 ditësh situata është përkeqësuar edhe në rrethin e Kukësit. Përmendim këtu zjarret në zonën e Gjallicës, në Shën Mëri, në Tërthore dhe në zonën e Qafës së Komit. Në rrethin e Pukës, ku aktualisht ka disa vatra zjarri, zona më problematike është zjarri në zonën e Tërbunit. Në pjesën e Shqipërisë së Mesme, zjarri më problematik ndodhet në zonën e Sopotit, në rrethin e Librazhdit.”- deklaroi specialisti në Ministrinë e Mjedisit, Genci Hoxhaj.

Ministria e Mjedisit i është drejtuar Malit të Zi dhe Greqisë për ndihmë nga ajri për zjarret më problematike, por edhe në këto vende situata është e vështirë.
“Ne ndihmë nga vendet fqinje kemi kërkuar për mbështetje nga ajri, pasi vendi ynë nuk ka mjetet për ndërhyrje nga ajri. Kjo është bërë për shkak të terrenit të vështirë dhe për shkak të kushteve atmosferike të vështira.”- u shpreh Hoxhaj.

Ekspertët e Ministrisë së Mjedisit iu bëjnë apel qytetarëve që të tregojnë kujdes në përdorimin e zjarrit. Pasi rezulton se shkaqet kryesore të zjarreve janë zjarrvënie e qëllimshme dhe pakujdesia. (BW/INA)