Sulmohet makina e kryeministrit Berisha me qese mielli

Automjeti i kryeministrit shqiptar Sali Berisha është goditur sot paradite me qese mielli në hyrje të ambientit të Kuvendit ku po zhvillohej seanca plenare e radhës.

Policia ka shoqëruar dy ish-të burgosur politike si autorë të incidentit. 

TvNews24 mëson se dy ish-të përndjekur politikë kanë hedhur secili nga një qese me miell në drejtim të automjetit të Berishës, në momentin sapo kanë parë që eskorta e kryeministrit po i afrohej hyrjes së Kuvendit. 

Efektivë të policisë të komisariatit numër 1 kanë reaguar menjëherë duke prangosur 2 shtetasit, Skënder Tufa, kreu i shoqatës së ish-të burgosurve politikë të Shqipërisë, dhe ish-i burgosuri, Agim Kollcaku. Ata ishin sot pjesë e një tubimi që mbahej para parlamentit kundër aktit normativ të personave të pastrehë.

Tufa dhe Kollçaku e kanë komentuar këtë gjest të sotëm ndaj kryeministrit si një akt simbolik, për t'i kujtuar qeverisë, gjendjen e mjeruar të burgosurve politikë dhe te mos tallet me problemet e tyre. Sipas Tufës, kjo formë proteste është brenda normave demokratike. 

 Ata kërkojnë dhënien e dëmshpërblimeve si dhe të një trajtimi më të mirë social ndaj ish të përndjekurve politikë.

Incidenti i sotëm me autorë ish-të përndjekurit politikë pason atë të muajit mars të këtij viti, kur dy ish-të burgosur politikë qëlluan me grusht kryetarin e Komisionit të Ligjeve dhe njëkohësisht deputetin PD, Ilir Rusmajli. (INA)