75 mijë shqiptarë ‘non grata’ në BE

"75 mijë shqiptarë ‘non grata’”. Kjo është shifra që ka publikuar ditën e djeshme, vetë kreu i Drejtorisë së Kufirit dhe Migracionit të Shqipërisë, Pëllumb Nako, në një tryezë për lëvizjen e lirë, organizuar nga Instituti për Demokraci dhe Ndërmjetësim.

Sipas Nakos, 75 mijë shqiptarë janë persona të padëshiruar për vendet e Bashkimit Europian.

Kreu i Kufirit dhe Migracionit, sqaron se fakti që numri i shqiptarëve “non grata” është kaq i lartë, ka lidhje me veprimtarinë e tyre të paligjshme, duke përfshirë edhe shkeljet e rregullave të lëvizjes.

“Në momentin që ka filluar liberalizimi i vizave në mënyrë informale, ka qenë rreth 75 mijë numri i personave të cilët kanë qenë të padëshirueshëm në hapësirën Shengen, pra, 75 mijë persona të cilët ishin kandidatë për emigracion ilegal, 75 mijë persona që nuk plotësonin më kushtet për të hyrë në zonën Shengen”, ka theksuar Nako.

Pas liberalizimit të vizave drejt vendeve të Bashkimit Europian, gjithsej kanë lëvizur 7 milionë shqiptarë, ndërsa çdo vit kanë depërtuar 75 mijë shqiptarë. Në fillim të procesit të liberalizimit të vizave, pati shumë fluks nga ana e shtesave shqiptarë për të përfituar azil. Shkaqet kryesore për azilantët shqiptarë me destinacion shtetet europiane, kishin lidhje me punësimin, problemet sociale, fenomenin e gjakmarrjes, por edhe shkaqet politike.  (BW/INA)