Skandal: Tema e Diplomës blihet vetëm me 70 euro

0

Punimi i temës së diplomës dikujt i merr gjashtë muaj kohë, e dikujt kjo i kushton 70 euro.

Në faqen e shit-blerjes “merrjep.com” dhjetëra persona kanë vendosur shpallje, ku tregojnë se bëjnë punime diplome me pagesë.

Për çfarëdo drejtimi, e tëra që i duhet studentit është që t’ia tregojë agjencionit literaturën dhe pjesa tjetër përfundon brenda tre javësh.

Kështu mësoi Tribuna Channel kur telefonoi njërin prej tyre, që e kishte të publikuar shpalljen në këtë ueb-faqe.

Gazetari u prezantua si një student i drejtimit të Marketingut në fakultetin Ekonomik. Agjencioni i shpjegon atij në detaje procedurat që duhet të ndjekë.

Ajo tregon se ky punim përfundon brenda tre javësh dhe garanton se punimi nuk është plagjiaturë. 70 euro është çmimi që duhet paguar dhe vajza që punon në agjencion tregon se ky çmim është mjaft i lirë, pasi sipas saj çmimi në Prishtinë shkon deri në 100 euro.

Në ueb-faqen “merrje”, hapur dhe pa u fshehur nga Policia, Prokuroria, apo Inspektorati i Arsimit dhjetëra persona ofrojnë këtë shërbim.

Pas tre javësh përpjekje, për të marrë një përgjigje për këtë çështje nga ministri i Arsimit, Shyqiri Bytyqi ai tha vetëm dy fjalë se kjo nuk është kompetencë e kësaj ministrie.

Profesori i departamentit të historisë në Universitetin e Prishtinës, Gazmend Rizaj deklaron për Tribuna Channel se punimet e diplomës me pagesë nuk janë një fenomen.

“Këto praktika mund të jenë pjesë e një numri shumë të kufizuara të studentëve. Nuk e besoj që mund të jetë një fenomen për shqetësim. Të paktën për aq sa kam njohuri. Unë punoj qe disa dekada si profesor në universitetin e Prishtinës dhe diçka e tillë as nuk ka ndodhë”

Policia e Kosovës të kontaktuar nga Televizioni kanë deklaruar se ka raste kur hetojnë shkelje të tilla.

“Kur paraqiten këto raste ato i heton Policia Ekonomike. Ndonjëherë këto raste dalin se janë vetëm asistim teknik, prandaj kur janë të tilla ato nuk janë vepra penale”.

Komentet

komentet