Trajneri serb bllokon transferimin e Harbuzit

- Trajneri serb i Real Valladolidit, Miroslav Gjukiq, ka bllokuar kalimin e mesfushorit kosovar Labinot Harbuzi te skuadra e La Ligas spanjolle. Sipas mediumeve spanjolle, Gjukiq vlerëson se Harbuzi nuk përmbush kërkesat minimale për të qenë pjesë e Valladolidit. Një ditë më parë, mediumet në Spanjë kanë raportuar se Valladolidi ka arritur marrëveshje për të angazhuar Harbuzin që është lojtar i lirë. Por të enjten, është raportuar se menaxhmenti sportiv i klubit ka menduar të bënte këtë lëvizje pa marrë mendimin paraprak nga trajneri. 

"Përgjigjja ime ishte gjithnjë jo. Kanë mbetur edhe dy muaj dhe nuk ka mundësi që tani të dëshmohet. Nuk dua që në këtë moment të prish raportet brenda grupit të lojtarëve. Për sa kohë që unë të jem trajner, asnjë lojtar nuk do të vijë në prova. Në ligën më të fortë në botë duhet të vish i përgatitur maksimalisht, nuk mund të vish ndryshe", ka thënë Gjukiq të enjten në një konferencë për shtyp. "Unë mund të jem gabim, pasi unë nuk jam zot, por nëse sekretariati teknik sjell lojtarë në të cilët unë nuk besoj, atëherë ata e marrin përgjegjësinë".

Ish-përzgjedhësi i Serbisë ka mohuar mundësinë që të ketë konflikt mes tij dhe menaxhmentit sportiv të klubit. Ai ka thënë se nuk e di ku mund të shohë cilësitë e Harbuzit që nuk ka luajtur nga tetori i vitit të kaluar.

"Ku mund të shohim atë? Në fushë? Duke vrapuar skaj lumit? Ne nuk jemi këtu për të mbajtur dietë. Po flasim për ligën më të fortë në botë. Nuk mund të vijnë të gjithë këtu. Është klub i nivelit të lartë, jo klub bukurie", ka thënë Gjukiq. 

Harbuzi 26-vjeçar në vjeshtë të vitit të kaluar pati tri paraqitje për Syrianskan në Kampionatin e Suedisë. Në Suedi ka luajtur edhe për Malmon, ndërsa karrierë ka bërë edhe në Turqi te Gençlerbirligi e Manisaspori. Para një dekade llogaritej ndër talentet më të mëdha në Suedi. Ai së fundi ka stërvitur me një ekip të kategorisë së katërt të Suedisë. 

Në fund të janarit, te Valladolidi kaloi mesfushori tjetër kosovar, Valdet Rama. Rama debutoi javën e kaluar si zëvendësues, ndërsa Gjukiq ka bërë të ditur të enjten se kosovari do të jetë startues në ndeshjen e ardhshme që luhet të shtunën kundër Real Sociedadit. Rama pritet të luajë si mesfushor i krahut të djathtë te Valladolidi mban pozitën e 11-të në Kampionatin spanjoll.

"Rama më ka bindur me minutat e parë me skuadrën, por na duhet të shohim si do të funksionojë nga fillimi. I mungojnë disa gjëra, por ai do të përmirësohet", ka thënë Miroslav Gjukiq.