107-vjeçarja nga Tetova: Më herët kam jetuar në skamje, po tani pa nipërit dhe mbesat më e varfër se kurrë

Fikrije Loki nga Tetova, e lindur në Kosovë, ka kaluar nëpër shumë vështirësi – luftëra, varfëri të skajshme, shpërngulje, vetmi, humbje të njerëzve të dashur, madje edhe të fëmijës, djalit të madh, por lufta dhe vullneti për një të nesërme më të mirë e mban gjallë.

Nënë Fikrija është 107 vjeçe, ka lindur më 10 janar 1914 dhe është ndër banorët më të vjetër të vendit.

Ajo tani ka 12 nipër dhe mbesa, nga tre djemtë e saj. Njëri nga djemtë ishte gurbetçar dhe vdiq nga kanceri në Danimarkë, ku tani jetojnë gruaja dhe fëmijët e tij..Vajza e saj është e martuar në Kalllnik të Gostivarit. 107-vjeçarja tani jeton me djalin e saj më të vogël, Raim Lokin, në një shtëpi të madhe trekatëshe në Tetovë. Edhe ai është kurbetçar, gruaja dhe tre fëmijët e tij janë në Zvicër, ndërsa ai është kthyer për t`u kujdesur për nënën e tij jetëgjatë.

Ai thotë se lokja Fikrije ishte edhe burri edhe gruaja në familje. Pasi ajo dhe bashkëshorti i saj erdhën në Maqedoni nga Kosova në vitin 1956, ata u kujdesën së bashku për fëmijët, por ai vdiq pas shatë vjetësh dhe që atëherë, nga viti 1963, krejt barra e shtëpisë dhe familjes ra mbi supet e saj.Ajo kurrë nuk u dorëzua, gjithçka që imagjinonte. dëshironte dhe thoshte e arrinte.Raimi thotë se Zoti e mbrojti, sepse ” e dinte se ajo po bënte më të mirën për ne”.