Si pasojë e përshkallëzimit të konfliktit në Lindjen e Mesme, 22 shtetas të Maqedonisë së Veriut kanë kërkuar ndihmë për evakuim nga Izraeli, njoftoi Ministria për Punë të Jashtme dhe Tregti të Jashtme (MPJ-TT).
Sipas autoriteteve izraelite, aktualisht rreth 40.000 të huaj, kryesisht turistë, janë bllokuar në territorin izraelit, për shkak të pezullimit të fluturimeve dhe mbylljes së hapësirës ajrore për trafikun civil, përcjell INA.
Kompania kombëtare ajrore izraelite “El Al Airlines” ka anuluar fluturimet deri më 23 qershor, me mundësi vazhdimi të kufizimeve nëse situata e sigurisë nuk përmirësohet.
Alternativa më e sigurt për largim mbetet kalimi tokësor drejt Jordanisë, nga ku ende operojnë fluturimet përmes aeroportit të Amanit.
MPJ-TT ka informuar se po zhvillon procedurat për evakuimin e qytetarëve dhe transferimin e tyre në një lokacion të sigurt, prej nga do të organizohet kthimi i tyre në vend. Përfaqësia diplomatike-konzullore në Tel Aviv është në komunikim të vazhdueshëm me shtetasit maqedonas që ndodhen atje.
📞 Po ashtu, është vendosur një linjë 24-orëshe ndihme nga Ministria izraelite e Turizmit, e disponueshme në gjuhën angleze dhe hebraike. Për shkak të situatës së tensionuar, muzeumet janë mbyllur, hyrja në Qytetin e Vjetër të Jerusalemit është ndaluar, dhe shumica e qendrave tregtare dhe dyqaneve kanë ndërprerë punën.
MPJ-TT u bën thirrje të gjithë shtetasve të Maqedonisë që ndodhen në Izrael apo Iran, që në rast nevoje për ndihmë konsullore të kontaktojnë menjëherë institucionet përkatëse përmes numrave emergjentë (SOS).
📍Kontaktet për ndihmë dhe asistencë:
Ambasada në Tel Aviv:
📞 +972 54 500 8566 / +972 54 967 0546
📧 [email protected]
Ministria për Punë të Jashtme dhe Tregti të Jashtme (MPJ-TT):
📞 +389 75 273 732 / +389 75 268 736
📧 [email protected]
Brenda Ministrisë është krijuar Shtabi i Krizës, i cili ndjek situatën në mënyrë të vazhdueshme dhe është në dispozicion 24/7 për çdo formë të ndihmës dhe koordinimit të mëtejmë.(INA)
