Gjashtë kandidatë janë në garë për rektor të Universitetit “Shën Kiril dhe Metodi” në Shkup. Zgjedhjet për të parin e këtij universiteti më të vjetër në vend do të mbahen më 30 maj, përcjell INA.
Sipas afatit të konkursit, deri sot e martë janë pranuar gjashtë aplikacione nga profesorë të këtij universiteti për garën për rektor për mandatin 16 shtator 2023 – 15 shtator 2026.
Në garë siç mëson portali Meta janë: dekani i Fakultetit Filozofik prof.dr. Ratko Duev, pastaj prof.dr. Goran Ajdinski poashtu nga Fakulteti Filozofik, prof.dr. Hristina Spasevska prorektore për mësimdhënie dhe profesoreshë nga Fakulteti i Elektroteknikës dhe Teknologjive Informative (FEIT), prof.dr. Dimitar Tashkovski nga FEIT, prof.dr. Atanas Koçov nga Fakulteti i Inxhinierisë Mekanike, si dhe prorektorja aktuale për financa, prof.dr. Biljana Angelova.
Por Komisioni zyrtarisht do të përcaktojë listën e kandidatëve që do të hyjnë në garë, emrat e të cilëve do të publikohen në faqen e internetit të universitetit.
Rektori aktual është prof.dr. Nikolla Jankullovski, i cili këtë pozitë e mbajti për dy mandate.(INA)
