Në vitin 2022, në Shqipëri kanë ardhur 13 milionë vizitorë, nga të cilët 7.5 milionë shtetas të huaj. Të dhënat për vitin e plotë, dalin nga Instituti i Statistikave, ku përfshihet dhe dhjetori, kur vendin e vizituan 965 mijë njerëz.
Në raport me vitin 2021, vizitat janë shtuar me 33%, numër ky që flet për fluksin më të lartë të regjistruar ndonjëherë.
Numri më i madh i vizitorëve, pjesa më e madhe e të cilëve turistë, kanë ardhur nga Kosova, Maqedonia e Veriut e Italia. Ndërkohë, nga Spanja dhe Anglia ka pasur rritje më të madhe të udhëtarëve në krahasim me vitin 2021. Shtimi i linjave ajrore, investimi në turizëm dhe aktivitetet sportive e muzikore të zhvilluara kanë ndikuar në zgjerimin e vizitave gjatë vitit të kaluar.
Një tjetër faktor ka qenë edhe zbehja e pandemisë COVID, ku për shkak të lëvizjes është rritur edhe fluksi i udhëtimeve jashtë vendit nga shqiptarët.
Të dhënat tregojnë se, numri i shtetasve shqiptarë të dalë nga Shqipëria në vitin 2022 është 5.8 milionë me rritje rreth 40% krahasuar me një vit më parë.
