Saktësisht shtatë vjet më parë, më 17 qershor 2018, në fshatin Nivici (Psarades) buzë Liqenit të Prespës në anën greke, përfaqësuesit e Maqedonisë dhe Greqisë nënshkruan Marrëveshjen e Prespës, duke i dhënë fund një mosmarrëveshjeje dekadash për çështjen e emrit të Maqedonisë, përcjell INA.
Marrëveshja, e arritur nën kujdesin e Kombeve të Bashkuara, parashikoi që ish-Republika e Maqedonisë të ndryshojë emrin në “Republika e Maqedonisë së Veriut”. Në këmbim, Greqia hoqi veton për anëtarësimin e vendit në NATO dhe mbështeti integrimin e tij euroatlantik, përfshirë njohjen e gjuhës maqedonase dhe të kombësisë.
Ceremonia e nënshkrimit u mbajt në prani të ministrave të Jashtëm të atëhershëm, Nikola Dimitrov dhe Nikos Kotzias, si dhe kryeministrave Zoran Zaev dhe Alexis Tsipras. Në këtë ngjarje historike morën pjesë edhe ndërmjetësi i OKB-së Matthew Nimetz, ish-komisioneri për zgjerim i BE-së Johannes Hahn dhe ish-shefja e diplomacisë evropiane Federica Mogherini, së bashku me zyrtarë të tjerë ndërkombëtarë dhe përfaqësues nga të dyja vendet.
Nënshkrimi i marrëveshjes shënoi një moment të rëndësishëm në historinë e marrëdhënieve dypalëshe, duke i hapur rrugë intensifikimit të bashkëpunimit politik, ekonomik dhe rajonal mes Shkupit dhe Athinës.
Marrëveshja e Prespës vazhdon të jetë temë e debatit politik në të dyja vendet, ndërsa ndikimi i saj në proceset integruese të Maqedonisë së Veriut mbetet vendimtar.(INA)
