70 vjeçari nga Struga ka humbur jetën tragjikisht në autobus në Serbi, teksa po udhëtonte nga Gjermania drejt Maqedonisë së Veriut.
Ngjarja ka ndodhur mëngjesin e sotëm, rreth orës 10:00, pranë vendbanimit Mihajllovac në Serbi.
Autobusi kishte ndaluar në një parking pranë një restoranti në autostradën Beograd–Nish, kur bashkëudhëtarët vunë re se i moshuari nuk po ndihej mirë. Ata tentuan ta ndihmojnë dhe menjëherë kërkuan ndihmë mjekësore.
Ekipet e ndihmës së shpejtë mbërritën në vendngjarje së bashku me policinë, por përpjekjet për reanimim ishin të pasuksesshme. Viktima ishte 70 vjeç dhe, sipas raportimeve të para, shkaku i vdekjes nuk është përcaktuar ende. Trupi i të ndjerit është dërguar për autopsi.
Autoritetet serbe kanë hapur hetim për të zbardhur rrethanat e plota të ngjarjes.(INA)
