Ministri i Shëndetësisë në Maqedoninë e Veriut, Bekim Sali nuk jep sinjale se për momentin do të ketë heqje të plotë të masave anti-COVID-19 apo reduktim të tyre.
Ministri Sali tha dje se janë duke e monitoruar situatën dhe në bazë të asaj që marrin si rezultat i analizave të tyre, ende nuk është koha për të shfuqizuar plotësisht masat apo reduktimin e tyre.
Një nga treguesit, siç tha ai, është numri i të sapoinfektuarve, por një tregues i rëndësishëm është numri i pacientëve që janë të shtruar në spital dhe që sipas asaj gjendjeje ende nuk jemi gati të ulim masat. Ministri shtoi se disa nga qendrat e Covid-it në vend janë të mbyllura dhe nuk ka nevojë për shtretër shtesë.
Sipas të dhënave të publikuara dje nga Instituti i Shëndetit Publik, janë kryer 2635 analiza dhe janë regjistruar 277 raste të reja me KOVID-19, nga të cilët 44 të riinfektuar, tetë të vdekur dhe 132 të shëruar.(INA)
