A do t’i bashkohen “sofrës” së Ahmetit?!

0

Kreu i BDI-së, Ali Ahmeti e bëri ftesën që pritej këtyre ditëve dhe po zihej nëpër koluaret partiake. Ai ka thirrë në tryezë të përbashkët krerët e partive shqiptare që fituan deputetë në zgjedhjet e 15 korrikut.

Sot edhe zyrtarisht dhe përmes një njoftimi, kreu i ASH-së, Ziadin Sela, Afrim Gashi nga Alternativa, kryetari i Lëvizjes BESA Bilall Kasami dhe Menduh Thaçin nga PDSH pranuan ftesat për takim të përbashkët, përcjell INA.

“Takimin ju ftoj që ta realizojmë në përvjetorin e Marrëveshjes së Ohrit, ditën e enjte, më 13 gusht 2020, me fillim në ora 12:00, në Hotel Park në Shkup”, shkruan Ahmeti.

Por partitë e ftuara që në start nuk kishin përgjigje dhe se thanë se këtë do ta bëjnë gjatë pasditës dhe orëve të natës, pasi që sic mësohet nuk e kanë të qartë skenarin e Ahmetit.

Nga Aleanca për Shqiptarët theksuan se vendimin do ta sjellin në një takim koordinues si koalicion me Alternativën. “Do të diskutojmë edhe për ftesën për tryezën e përbashkët dhe aty do të marrim qëndrim”, theksuan nga koalicioni ASH- AAA.

E nga Lëvizja BESA thotnë se vendimin do ta marrin organet partiake gjatë ditëve në vijim. “Presim të vendosim këtyre ditëve, nuk mund të themi asgjë tani për tani”, theksuan nga kjo parti. Edhe nga PDSH s’ka përgjigje për ftesën e Ahmetit.

Por lidhur me këtë tryezë ka folur sot kreu socialdemokrat Zoran Zaev, që pritet ta marrë mandatin për formimin e Qeverisë. Ai tha se ky është një presion ndaj tij.

“Në pyetjen, nëse ftesën e Ahmetit deri te partitë politike shqiptare e shoh si presion që të pranoj kryeministër me propozim të BDI-së, përgjigja ime është; po”, tha Zaev. Partitë shqiptare me 32 deputetë janë fitues të rëndësishëm të këtyre zgjedhjeve, pasi që për herë të parë u arrit të fitohet ky numër deputetësh.
BDI si parti fituese me 15 deputetë dhe që përcakton koalicionet për shkak të numrave, po vazhdon të kërkoj postin e kryeministrit, megjithatë kjo kërkesë është refuzuar deri tani nga LSDM, por në mënyrë indirekte edhe nga VMRO-DPMNE, por që kjo e fundit nuk ka një qëndrim të prerë. Koalicioni ASH- AAA ka theksuar se do ta përkrah BDI me 12 deputetët e tyre nëse do të ketë postin e kryeministrit. (INA)