Përkundër një klime paraprake tensionesh dhe mosmarrëveshjes midis Qeverisë së re në Shkup dhe autoriteteve shtetërore bullgare, sot në Sofje në një klimë pozitive u zhvillua një takim midis presidentit bullgar Rumen Radev dhe presidentes së RMV-së, Gordana Siljanovska-Davkova.
Dy presidentët nuk kanë dalur në konferencë të përbashkët për mediat, por kanë përcjellë mesazhe pozitive dhe shpresëdhënëse.
“Zgjidhja është e arritshme nëse kemi vullnet ta dëgjojmë, respektojmë dhe kuptojmë njëri-tjetrin”, deklaroi presidentja Gordana Siljanovska Davkova, e cila shtoi se takimi u mbajt në atmosferë të këndshme debati.
“Jam e bindur se biseda e sotme në një atmosferë të këndshme debati do të japë fryte, nuk mund të them se nesër do të ndodhë ajo, por është e rëndësishme të fillohet. Jam e sigurt se nëse e dëgjojmë njëri-tjetrin, nëse kemi vullnet për ta kuptuar njëri-tjetrin, atëherë zgjidhja është e arritshme”, deklaroi presidentja Siljanovska-Davkova.
Sipas saj, përfshirja e bullgarëve në Kushtetutë ishte ndër temat që u diskutuan, por tha se ajo nuk është një monark absolut për të ndryshuar Kushtetutën.
“Nëse jam monark absolut, mund të ndryshoj Kushtetutën, por deputetët përfaqësojnë qytetarët, votojnë sipas bindjes së tyre. Unë nuk mund ta pezulloj demokracinë parlamentare, por natyrisht që diskutojmë të gjitha çështjet, them se biseduam, sepse nuk mund të miratojmë një zgjidhje, as t’ia imponojmë kombit dhe të tjerëve. Por biseduam dhe kjo është e shëndetshme”, nënvizoi presidentja maqedone.
Presidenti bullgar Radev është prononcuar para takimit duke bërë të qartë se Sofja zyrtare pret që Maqedonia të përmbushë obligimet e saj.
“Është e vërtetë se muzika dhe kultura janë sfera që na afrojnë më shumë dhe Bullgaria ka qenë gjithmonë e hapur për dialog me Republikën e Maqedonisë së Veriut, dhe ne presim që ky dialog jo vetëm të ndihmojë afrimin tonë kulturor, por edhe t ‘i japë shtysë bashkëpunimit ekonomik. Ne gjithashtu presim që ky dialog të zgjidhë përfundimisht çështjet e hapura midis nesh. Marrëdhënia jonë do të bazohet në marrëveshjet tona. Ne presim që Republika e Maqedonisë së Veriut të përmbushë të gjitha obligimet e saj si ndaj nesh ashtu edhe ndaj Bashkimit Evropian. Ne ndjekim rreptësishtë protokollin. Është radha ime të bëj një vizitë zyrtare në Republikën e Maqedonisë së Veriut”, deklaroi Radev.
Kreu i shtetit bullgar shtoi se kjo është një mënyrë për të hapur procesin e negociatave për integrim të plotë evropian të fqinjit në interes të rinisë së vendit dhe kjo do të jetë një shenjë pozitive për të gjithë rajonin.
“Bullgaria nuk do të rinegociojë kushtet e marrëveshjes me Republikën e Maqedonisë së Veriut”, tha sot para takimit kryeministri teknik bullgar Dimitar Glavçev.
“Nuk ka asgjë për të negociuar. Ne kemi qëndrimin e Bullgarisë. Ata thonë se nuk do të negociojnë me një qeveri teknike, por unë do të thoja se nuk ka vullnet për të negociuar nga ana jonë, sepse nuk ka asgjë për të negociuar. Ajo ka një qëndrim të përbashkët evropian. Të negociojmë me Bashkimin Evropian”, tha Glavçev.
Në prag të vizitës, kryeministri Hristijan Mickoski, në përgjigje të pyetjes së gazetarit se pret nga ajo, përsëriti se vendi dëshiron të ndërtojë marrëdhënie të mira fqinjësore dhe se këtu nuk ka dilemë. (INA)
