Kryeparlamentari Afrim Gashi në Programin e Mëngjesit në Kanal 5 është përgjigjur në pyetjen se në çfarë Maqedonie dëshiron që të jetojnë fëmijët e tij?!
Gashi është përgjigjur se fëmijëve të tij dëshiron që t`i lë trashëgim një shtet të mirë.
“Unë këtë pyetje e kam parashtruar në vitin 2012-2013. Të gjithë ne duhet që të pyetemi një kohë, jo unë, por fëmijët e mi ku duan të jetojnë?! Nëse duam të jetojmë mirë ne edhe fëmijët tanë duhet patjetër ne të bëjmë diçka. Unë nuk kam menduar se duhet të pasurohem, të bëjë nuk e di se çfarë dhe këtë t`ia lë trashëgimi fëmijëve. Përkundrazi, unë mendoj se fëmijëve të mi t`i lë një shtet të mirë. Ku do të jetojnë në një sistem të mirë politik. Në një sistem të mirë arsimor. Në një sistem të mirë shëndetësor. Në një shtet ku do të ketë ajër të pastër. Ku do të ketë rrugë të mira. Ku do të ketë ujë të pastër. Ku do të ketë jetë të pasur dhe të mirë kulturore. Dhe raporte të mira njerëzore. Dhe këtë gjë po tentoj ta bëjë përmes politikës. E di që një njeri, disa njerëz nuk mundet këtë ta sjellin. Por në fund të fundit ne të gjithë jemi përgjegjës për veprimet tona dhe për angazhimin tonë”, deklaroi Gashi.
