Ambasadorja amerikane në Shkup, Angela Ageler në një intervistë për TV24 paralajmëroi se mund të ketë emra të rinj në “Listën e zezë” Amerikane para zgjedhjeve të majit, përcjell INA.
“Nuk e di nëse do të ketë emra të rinj para datës 9 maj. Por ka shanse që të ketë. Mund të them se po shqyrtohen një numër i madh emrash dhe po bëhen vlerësime”, theksoi ambasadorja Ageler në intervistën për TV 24.
Ambasadorja e SHBA-ve ka inkurajuar qytetarët që të dalin në zgjedhje dhe të japin votën e tyre.
“Asgjë nuk arrihet duke mos votuar dhe duke qëndruar në shtëpi. E di që ka shumë votues në vend që thonë se nuk do të votojnë, por kjo nuk është përgjigja e duhur”, beson ambasadorja Ageler.
Sipas saj, korrupsioni është kancer që pengon përparimin në këtë vend dhe se kjo përbën shqetësim.
“Puna jonë, partneritetet, aktivitetet, programet, sistemet që ndërtojmë bazohen në prioritetet që ndajmë me këtë vend dhe me këta qytetarë. Para se të vija këtu, përpara se Senati të konfirmonte emërimin tim, sepse kam shumë miq këtu, kam dëgjuar për shqetësimet e mëdha për korrupsionin. E njëjta gjë vlen edhe për ambasadorët amerikanë para meje. Arsyeja pse po flas për këtë, pse ekipi im po flet për të, pse SHBA po flet për të, pse liderët politikë në Uashington po flasin për të, është sepse ne dëgjojmë për atë problem çdo ditë. Sinqerisht, është si një kancer që po pengon përparimin në këtë vend. Duhet të flasim për të. Qytetarët e këtij vendi meritojnë të kenë drejtues, politikanë dhe zyrtarë në shëndetësi, arsim, gjyqësor dhe të punojnë për ta në mënyrë transparente. Dhe të ndëshkohen ata që nuk respektojnë rregullat, që ndërmarrin aktivitete korruptive në dobi të tyre”, deklaroi ambasadorja e SHBA-ve në Maqedoninë e Veriut. (INA)
ajo tha.
