Hoxha i njohur Ahmed Kalaja ka reaguar ashpër ndaj një deklarate të aktorit Laert Vasili në hapësirat e Big Brother VIP Albania, i cili sulmoi verbalisht Gjestin, pasi që ky i fundit bëri thirrjen e lutjes “Allahu ekber”. Laerti pasi dëgjoi Gjestin shkoi duke e kërcënuar se a e di kush bën këtë thirrje, ata që presin kokat-terroristët.
Laerti bëri një lidhje direkte midis thirrjes islame “Allahu Ekber” dhe terrorizmit.
Në një postim në rrjetet sociale, Kalaja e cilëson deklaratën e Vasilit si një shfaqje të qartë të islamofobisë dhe bën thirrje që institucionet përkatëse të reagojnë.
“Islamofobi e pastër në ditën me diell. Ky e lidh ‘Allahu Ekber’ (‘Zoti është më i Madhi’) me terrorizmin! Shpresojmë që Komisioni Kundër Diskriminimit të ndërmarrë masa”, shkruan Kalaja.
Deklaratat e Vasilit kanë ngjallur polemika të forta në rrjetet sociale dhe opinionin publik, me shumë përdorues që e kanë akuzuar për gjuhë urrejtjeje dhe nxitje të stereotipeve ndaj besimtarëve myslimanë.
Deri tani, nuk ka pasur një reagim zyrtar nga Komisioni Kundër Diskriminimit, ndërsa vetë aktori Laert Vasili i ka kërkuar falje Gjestit dhe gjithë muslimanëve.(INA)
