Albin Kurti
Gjuha shqipe është më e gjerë e më e thellë sesa secili prej neve dhe të gjithë ne bashkëkohanikëve që e flasim atë. E për ta avancuar studimin e gjuhës sonë të dashur, në datën e 21 shkurtit e cila shënon Ditën Ndërkombëtare të Gjuhës Amtare, nënshkruam Memorandumin e Bashkëpunimit ndërmjet Ministrisë së Arsimit, Shkencës, Teknologjisë dhe Inovacionit dhe Universitetit të Prishtinës, për zhvillimin dhe promovimin e Albanologjisë, me theks të veçantë në programet e gjuhës shqipe dhe letërsisë shqipe.
E kur përmendim fjalën “Albanologji”, më vjen në mend emri i Johan von Hahn, i njohur për veprën e tij kapitale në katër vëllime, “Studime Shqiptare”, nga ku nisi të konsolidohej termi “Albanologji” dhe “Albanolog”. Sa më shumë që ka studime shkencore edhe për këtë term, aq më tepër ia njohim edhe historinë Albanologjisë, e cila po ashtu është Albanologji!
Ky memorandum do të shërbejë për përkrahje financiare të stafit akademik të Universitetit të Prishtinës për publikime në revistat të cilat botohen nga Fakulteti i Filologjisë dhe Akademia e Shkencave dhe Arteve e Kosovës. Uroj shumë që gjatë pesë viteve të ardhshme sa e ka kohëzgjatjen ky memorandum, nga stafi akademik dhe studentët që përfitojnë prej tij, të prodhohen sa më shumë rezultate të reja dhe të vyera për studimet albanologjike.
