Aktivitetet ndërtimore për ndërtimin e spitaleve në Shtip, Tetovë dhe Kërçovë do të fillojnë deri në fund të këtij viti ose më së voni në fillim të vitit të ardhshëm, njoftoi sot Ministri i Shëndetësisë, Azir Aliu. Procedurat administrative, të cilat i paraprijnë aktiviteteve ndërtimore, do të fillojnë menjëherë pas nënshkrimit të marrëveshjes.
“Ne tashmë kemi paralajmëruar 205 milionë euro, ato janë për Shtipin, Tetovën dhe Kërçovën. Ato nuk janë fonde buxhetore, por do të jenë fonde nga marrëveshja qeveri-qeveri me britanikët. Unë ende nuk e kam nënshkruar marrëveshjen. Prisnim që të mbaronin zgjedhjet dhe pastaj të nënshkruhej marrëveshja dhe që ato të ishin pjesë e asaj infrastrukture. Thamë se do të fillonim me investime në infrastrukturë dhe hapi i parë janë këto tre klinika. Do të fillojnë edhe Shtipi, Tetova dhe Kërçova. Procedurat administrative do të fillojnë menjëherë, dhe infrastruktura, me shumë mundësi, drejt fundit të vitit ose në fillim të vitit të ardhshëm”, tha ministri Aliu.
Spitali në Kërçovë do të rindërtohet sepse objekti ekzistues, thotë ministri Aliu, nuk i plotëson kërkesat themelore të infrastrukturës për të qenë një institucion që do të ofrojë shërbime shëndetësore jo vetëm për Kërçovën, por për të gjithë rajonin.
Më 26 qershor të këtij viti, kryeministri Hristijan Mickoski dhe Ministri i Shëndetësisë Azir Aliu njoftuan një marrëveshje strategjike me Mbretërinë e Bashkuar për rindërtimin dhe ndërtimin e spitaleve në Shtip, Tetovë dhe Kërçovë.
Projekti parashikon përfundimin e spitalit klinik në Shtip, ndërtimin e një fakulteti mjekësor dhe një konvikti studentor me 200 shtretër, ndërtimin e një spitali krejtësisht të ri në Kërçovë dhe rindërtimin dhe pajisjen e plotë të spitalit ekzistues në Tetovë.
