Zv.ministri i kulturës, Daim Luçi, si duket do të jetë ndër të vetmit që do të qëndrojë edhe më tej në funksion deri në fund të mandatit të Qeverisë, pasi dje partia e tij Alternativa vendosi që në të ardhmen të veprojë si parti opozitare.
Kryeministri Kovaçevski sot në Kuvend do të dorëzojë propozim listën për ndryshim të figurave kadrovike, ku do të ketë fytyra të reja nga Aleanca për Shqiptarët. Mes shumë ndryshimeve dhe largimeve të të gjithë funksionarëve të Alternativës, në këtë listë nuk gjendet dhe zv.ministri i kulturës Daim Luçi, transmeton Zhurnal.
Arsyeja për këtë me shumë mundësi qëndron te ajo se Luçi i përket ekipit të Skender Rexhepit, deputetit të Alternativës i cili po funksionon si i pavarur dhe “DO TË VOTOJË PRO” përbërjes së re qeveritare. Rexhepi vetëm ka theksuar se ka disa vërejtje dhe disa kushte por se nuk do të votojë kundër hyrjes së ASH-së në pushtet.
Nga Qeveria për këtë janë përgjigur shkurtimisht vetëm se kryeministri Kovaçevski do të sqarojë gjithçka në seancën kuvendore.
Përndryshe Kovaçevski ka dërguar kërkesë deri te kryetari i Kuvendit Talat Xhaferi për shkarkimin e ministrave dhe zv.ministrave të Alternativës, si dhe për shkarkimin e Bashkim Hasanit si zv.ministër i mbrojtjes./Zhurnal.mk