Për dy vjet, Ambasada ruse në Shkup ka publikuar dy herë më shumë postime në rrjetet sociale sesa misionet diplomatike të BE-së, SHBA-së, Britanisë dhe vendeve të tjera.
Sipas hulumtimit të Qendrës për Studimin e Demokracisë nga Sofja, kjo është pjesë e strategjisë propagandistike të Kremlinit dhe luftës hibride.
Analiza tregon gjithashtu se Ambasada ruse në Shkup ka shumë më tepër njoftime se MPJ-ja e Maqedonisë.
Ky aktivitet, sipas Goran Georgiev, studiues në institucionin e lartëpërmendur është pjesë e strategjisë së Kremlinit për të përhapur ndikimin dhe propagandën ruse.
“Profilet e ambasadave ruse në rrjetet sociale janë një kanal dhe përforcues i propagandës ruse dhe i gjithë gamës së narrativave të dezinformatave që vijnë nga Kremlini, shumica e të cilave janë të drejtuara kundër Perëndimit dhe mënyrës së jetesës demokratike.
Ambasadat kryejnë një funksion kyç informativ (por edhe operacional) në luftën informative të Kremlinit kundër botës së lirë. Numri i përgjithshëm i postimeve nga misionet diplomatike ruse në rrjetet sociale është rritur ndjeshëm që nga fillimi i pushtimit të Ukrainës, dhe dezinformimi është eksplicit dhe më agresiv se kurrë.Ka prova për këtë”, tha Georgiev për Radion Evropa e Lirë (RSE), përcjell agjencia e lajmeve INA.
Numri i postimeve të Ambasadës Ruse në Shkup në rrjetet sociale është disa herë më i madh se numri i postimeve të Ministrisë së Punëve të Jashtme të Maqedonisë, e cila, sipas hulumtimit, poston mesatarisht tre postime në javë. (INA)
