Ambasadori i Izraelit në Serbi, Yahel Vilan, ka reaguar ndaj deklaratave të trajnerit të ekipit të Izraelit në futboll, Alon Haza, i cili, gjatë një konference për media para ndeshjes midis Kosovës dhe Izraelit në Prishtinë, ka thënë se të dyja shtetet kanë kaluar nëpër situata të njëjta – referencë për luftën e Kosovës (1999) dhe situatës në Lindjen e Mesme (2023).
“Dëshiroj të mohoj fuqishëm fjalët e trajnerit të ekipit kombëtar të futbollit të Izraelit dhe të riafirmoj vlerësimin e thellë të Izraelit për Serbinë dhe popullin serb. Serbia e ka dëshmuar veten mike të vërtetë dhe e ka bërë këtë edhe një herë në këto kohë sfiduese, veçanërisht në fushën e sportit”, ka shkruar ambasadori izraelit në platformën “X” të dielën në mbrëmje.
Kosova ka fituar ndeshjen kundër Izraelit në kuadër të kualifikimeve për Kampionatin Evropian 2024. Ndeshja është zhvilluar të dielën në stadiumin nacional “Fadil Vokrri” në Prishtinë. Ajo ishte paraparë të zhvillohej muajin e kaluar, por për shkak të situatës së krijuar në Lindjen e Mesme, ajo ishte shtyrë për 12 nëntor.
Autoritetet e Kosovës kishin ngritur paraprakisht nivelin e sigurisë prejse futbollistët izraelitë kishin mbërritur në Kosovë të premten, duke bllokuar rrugët përreth stadiumit “Fadil Vokrri” dhe duke kryer kontrolle të rrepta për tifozët para ndeshjes. Kjo ndeshje ka qenë e para për kombëtaren izraelite prej se nisi lufta mes Izraelit dhe Palestinës./Albanianpost.com
