Sipas zërave jozyrtare diplomatike, pritet që deri në fund të këtij muaji të bëhet publikimi i listës së ashtuquajtur të zezë amerikane.
Në ndërkohë, zëvendëskryetari i Ambasadës Amerikane në Shkup, Eric Meyer, do të vizitojë Komisionin Shtetëror për Parandalimin e Korrupsion, shkruan gazeta Sloboden Pecat.
“Nuk kemi planifikuar fare një takim të tillë apo ndonjë informacion tjetër. Është e vërtetë që unë dhe Meyer ishim në një event të përbashkët, por kjo nuk u diskutua. Kemi kontakte edhe me persona të tjerë nga ambasada amerikane gjatë kësaj periudhe, por në lidhje me zbatimin e reformave në gjyqësor”, theksoi kryetarja e Komisionit, Biljana Ivanovska.
Nga përvoja në vendet e tjera dhe nga ato që kanë deklaruar deri më tani përfaqësuesit amerikanë, qeveria në Maqedoninë e Veriut megjithatë do të jetë e përfshirë në procesin e pastrimit të sistemit.
“Ne do të bëjmë gjithçka që është e mundur që aktorët e korruptuar të mbajnë përgjegjësi, dhe qeveria jonë ka mjetet për këtë. Por ne nuk jemi faktori vendimtar në luftën kundër korrupsionit”, shtoi zëvendësambasadori amerikan javën e kaluar.
Pas vizitës së muajit të kaluar të tre diplomatëve të Departamentit të Shtetit, shefi i shtetit Stevo Pendarovski, edhe pse vendosi të mbajë pjesën më të madhe të njohurive për vete, konfirmoi se e ashtuquajtura “Lista e zezë” nuk do të përfshijë vetëm politikanë, por do të përfshihen njerëz nga biznesi, nga gjyqësori dhe nga sektorë të tjerë jetikë të shoqërisë. Ai nuk përjashtoi mundësinë e gjetjes së zyrtarëve aktualë në listë.
E ashtuquajtura “Lista e Zezë” është përpiluar nga Zyra e Kontrollit të Pasurive të Huaja (OFAC) e Departamentit të Thesarit të SHBA. Siç dihet, në listën e përditësuar janë 12 emra nga vendi, që nga 6 janari i këtij viti. Ish-kryeministri Nikola Gruevski dhe drejtori i Drejtorisë së Sigurisë dhe Kundërzbulimit Sasho Mijalkov ishin të fundit që u shtuan në prill të vitit 2022.(INA)
