Ancelotti zbulon dëshirën e tij për një finale të Botërorit mes Brazilit dhe Italisë
Carlo Ancelotti, trajneri aktual i kombëtares së Brazilit, e ka përqendruar vëmendjen e tij plotësisht te Kampionati Botëror i ardhshëm, duke synuar t’i shtojë trofeut të tij tashmë të pasur edhe titullin global.
Trajneri italian ndau objektivat e tij dhe shprehu një dëshirë personale të veçantë në një intervistë të fundit në programin “Dribbling” të “Rai Due”.
Ancelotti konfirmoi se objektivi për “Seleçãon” është i qartë, duke theksuar se presioni po rritet për shkak të pritjes 24-vjeçare të kombëtares për një titull.
Ai tha, përmes “Calciomercato”: “Ëndrra është ta bëjmë Brazilin të fitojë Kupën e Botës për herë të gjashtë. Ka pritshmëri të mëdha, por edhe shumë entuziazëm. Fakti që nuk kanë fituar për 24 vjet rëndon shumë. Shpresojmë të mos bëhen 28! Duam të fitojmë dhe këtë nuk e fshehim”.
I pyetur për mundësinë e një përballjeje me ngarkesë emocionale, Ancelotti pranoi se shpreson të përballet me vendin e tij të lindjes në ndeshjen finale.
“Do të doja një finale mes Brazilit dhe Italisë, do të ishte e bukur për mua në aspektin emocional”, tha ai.
Finalja e mundshme, që do të zhvillohet në Shtetet e Bashkuara, Kanada dhe Meksikë në qershor dhe korrik, varet nga kualifikimi i Italisë, e cila aktualisht rrezikon të ndjekë rrugën e play-offit – ndryshe nga Brazili që tashmë është kualifikuar.
“Azzurrët” ende nuk e kanë siguruar vendin e tyre në turne dhe ka gjasa të kualifikohen përmes play-offit./GazetaExpress/
