Ambasadori i ShbA-së në Serbi, Chris Hill, ka vizituar sot kryetarin e komunës së Preshevës, Shqiprim Arifi.
I pari i preshevarëve bëri të ditur se temë kryesore gjatë takimit me Hillin ishte pasivizimi i adresave të shqiptarëve në Luginë, për të cilin tha se ambasadori amerikan ishte i informuar për problemet.
“Kemi shkëmbyer me njëri-tjetrin situata të reja. Kemi bërë analizë të mundësive të zgjidhjeve të shumë problemeve tona. Shembull, pasivizimi i shqiptarëve të Luginës nuk është të njëjtin stad sikur ka qenë para një viti apo dy vitesh”.
“Sot me ambasadorin kemi hyrë edhe më në detaje të shumta, që ta sqarojmë edhe më shumë pengesën që na bën pasivizimi neve shqiptarëve autokton në këtë vend”, tha Arifi për Klan Kosova.
Arifi tha se me ambasadorin Hill kanë folur për shifra konkrete, ku sipas tij, deri më tani janë 10 mijë shqiptarë, adresa e të cilëve është pasivizuar.
“Kemi folur për pamundësinë që e kemi për t’i marrë shërbimet administrative në komunën tonë, sic është leja e ndërtimit, mundësia për ta marrë një certifikatë të lindjes e mundësia për të votuar, të cilat në momentin kur je i pasivizuar nuk i këto të drejta. Kemi hyrë edhe në shifra, ku sipas shifrave tona, janë 10 mijë shqiptarë që pasivizohen”, tha ai.
