Armend Alimit i ka përfunduar kontrata me Rabotnickin e Shkupit dhe tani është lojtar i lirë. Mesfushori me përvojë të madhe nga Kumanova dhe skuadra shkupjane duhet të ulen për të biseduar për vazhdimin e bashkëpunimit.
Mirëpo, Open-TV ka marrë vesh se për Alimin ka interesime edhe nga disa klube ambicioze të Ligës së dytë në vendin tonë.
Në ditë në vijim do të shihet, nëse Alimi do të merret vesh me “romantikët” ose do të vazhdoj karrierën në ndonjë klub që ka ambicie të mëdha për në elitën e futbollit.
Gjatë karrierës së tij të gjatë, 35-vjecari ka luajtur për Bashkimin dhe Milamo e Kumanovës, Istrën nga Kroacia, Orebron e Suedisë, Ermis dhe Nea Salamis nga Qipro, Shkëndijën e Tetovës dhe së fundmi me Rabotnickin.
Me Shkëndijën, ai ka fituar tituj kampioni, ndërsa ka luajtur edhe në kualifikimet e Ligës së kampionëve dhe të Europës. Janë të paharrueshme ndeshjet me Milanin në San Siro, Rosenborgun norvegjez, Gentin e Blegjikës dhe shumë të tjera. (Open-TV)
