Bujanoc: Arrestim i ndihmës kryetarit të komunës dhe babait të tij pas rrahjes së një polici në pension
Një incident ka ndodhur në Bujanoc, ku ndihmësi i kryetarit të komunës, Stefan Arsiç, dhe babai i tij, Sasha Arsiç, janë arrestuar nën dyshimin për sulm fizik ndaj një polici në pension.
Sipas burimeve nga organet hetimore, ngjarja ka ndodhur para disa ditësh, ndërsa arrestimi i dy të dyshuarve është kryer dje, pas një periudhe gjatë së cilës ata dyshohet se ishin në arrati. Polici në pension, i cili pësoi lëndime të rënda, është dërguar me urgjencë në Qendrën Klinike të Nishit për trajtim mjekësor.
Pas marrjes në pyetje, Gjykata Themelore në Bujanoc ka vendosur masën e paraburgimit prej 30 ditësh për të dy personat e përfshirë, deri në përfundimin e hetimeve.
Autoritetet po vazhdojnë hetimet për të zbardhur rrethanat e plota të ngjarjes dhe motivet që çuan në sulmin ndaj ish-policit. Ndërkohë, ky incident ka shkaktuar reagime të shumta në opinionin lokal për shkak të pozitës publike që mban njëri nga të arrestuarit./Presheva.com
