Kuvendi Qendror i Aleancës për Shqiptarët do të mblidhet të shtunën dhe siç bëjnë të ditur nga kjo parti për TV21, do të diskutohet për mundësinë e hyrjes në qeverinë e drejtuar nga Dimitar Kovaçevski.
“Të shtunën mbahet mbledhja e Kuvendit Qendror të partisë dhe aty do të formohen organet udhëheqëse. Pas Kuvendit organet e reja të partisë do të shqyrtojnë mundësinë e hyrjes në Qeveri dhe bisedimet eventuale”, thonë nga Aleanca për Shqiptarët.
Megjithatë, nuk pritet një vendim përfundimtar për t’u bërë pjesë e ekzekutivit, pasi siç thonë nga ASh, kjo temë do të elaborohet për disa ditë radhazi, me organet qendrore, me strukturat lokale dhe me partinë në pushtet.
Mësohet se rreth kësaj teme, do të diskutohet edhe të premten, në takimin që Aleanca për Shqiptarët nën udhëheqjen e Arben Taravarit do të zhvillojë me ambasadoren e Shteteve të Bashkuara të Amerikës në Shkup.
