Asnjë reagim, asnjë përgjegjësi për vjedhjen masive të rrymës nga objekte gastronomike dhe hotelerike ne qendër të Shkupit, të cilët bëjnë dëm milionësh e që e paguajnë amvisëritë, ndërsa a ju kujtohen reagimet për Haraçinën dhe Sllupçanin? Kështu shkruan ish-ministri i Ekonomisë, Kreshnik Bekteshi, ndërsa komenton vjedhjen e madhe që EVN ka konstatuar në lagjen Debar Maallo, Qendrën Tregtare “Leptokaria”, dyqane në rrugën “Maqedonia” në Shkup, në “Shirok Sokak” në Manastir, kafene të njohura në mbarë Maqedoninë ku është vërejtur vjedhje e rrymës përmes manipulimit të orëmatësit.
Bëhet fjalë për kompani që shpenzojnë disa mijëra euro në muaj për energjinë elektrike. Vetëm një furrë buke ka vjedhur energji elektrike sa një fshat i tërë.
Rreth 600 përdorues kanë vjedhur energji elektrike duke manipuluar një orëmatës që ngrin konsumin. Shumica prej tyre janë hotele, kafene, furra buke të njohura nga Shkupi dhe nga vendi, të vendosura në qendër të Shkupit, respektivisht në Debar Maallo, në rrugën Maqedonia, në Leptokaria në Shkup, në Shirok Sokak në Manastir dhe në vende të tjera atraktive në mbarë Maqedoninë. Vjedhjet e energjisë elektrike janë regjistruar nga sistemi EVN, i cili menjëherë reagon ndaj devijimeve të konsumit, pas së cilës ekipet e EVN-së kryejnë kontrolle në terren. Në një furrë buke është konstatuar se është vjedhur energjia elektrike sa harxhon mesatarisht një fshat i tërë. Me këtë lloj manipulimi të orëmatësit, ata jo vetëm që nuk regjistrojnë konsumin, por edhe e kthejnë mbrapa.
Statusi i plotë i ish-ministrit Kreshnik Bekteshi:
SKANDAL në qendër të Shkupit!
Kafeteri dhe objekte hotelerike masovikisht VJEDHIN rrymë.
“A ju kujtohen reagimet për Haraçinën dhe Sllupçanin?
Pagesa e rrymës është mbi 95% në ato vendbanime.
Asnjë reagim, asnjë përgjegjësi për vjedhjen masive të rrymës nga objekte gastronomike dhe hotelerike ne qendër të Shkupit, të cilët bëjnë dëm milionësh e që e paguajnë amvisëritë.
Apo reagime ka vetëm atëherë kur me direktiva të qendrave të ndryshme duhet dikë të paraqesin si të “prapambetur”, të padëgjushësh etj?
