Shkruan: Iljasa Salihu
Gjithkund mund të shihet se gjuha shqipe nuk është gjuhë zyrtare në Maqedoni. Pjesërisht është e pranishme, por kjo nuk e bën gjuhën shqipe gjuhë zyrtare, as të barabartë me maqedonishten.
Është lozur e tallur aq shumë me këtë gjuhë, saqë po të kishte gjuhë kjo gjuhë, rëndë do të na mallkonte. Përmes premtimit për zyrtarizimin e kësaj gjuhe, janë mbledhur shumë vota, por sërish e gjora gjuhë ka mbetur e gjymtuar. Ata që për dekada nuk arritën ta zyrtarizojnë një gjuhë përkundër një lufte të armatosur dhe të paktën ta hapnin një pikë kufitare, më e pakta që mund të bëjnë, është t’i kapin gjuhët e tyre me dorë dhe të mos flasin fare.
Kurse, VLEN-i nëse dëshiron të mos bëhet si ata, nuk duhet të veprojë si ata, sepse vitet shpejt ecin e mejdanit askush nuk mund t’i shmanget. Të mos harrojmë se e sotmja dje ishte një e nesërme dhe nesër do të bëhet një e kaluar dhe nuk kemi të kaluar pa një përgjegjësi. Të mençur janë ata që janë të kujdesshëm sot, pikërisht në mbretëreshën e kohërave.
