Atletico Madrid ka shënuar fitore me rezultat 4-2 ndaj Valladolid në një përballje dramatike që është karakterizuar nga shumë emocione dhe përmbysje në LaLiga.
Edhe pse miqtë kanë shënuar të parët, skuadra e Diego Simeone ka reaguar fuqishëm për të marrë tri pikë të vlefshme kur kampionati po shkon nga fundi.
Valladolid ka kaluar në epërsi në minutën e 21-të me një gol nga pika e bardhë i shënuar nga Sylla.
Atletico ka reaguar menjëherë, duke barazuar në minutën e 25-të me një tjetër penallti të realizuar nga Julian Alvarez, ndërsa dy minuta më vonë ka qenë Giovanni Simeone që e ka përmbysur rezultatin pas një asisti nga Barrios.
Pjesa e dytë ka nisur me një tjetër goditje për vendasit, pasi Sanchez i Valladolid e ka barazuar në minutën e 56-të.
Por Atletico nuk është dorëzuar. Alvarez ka realizuar sërish nga penalltia në minutën e 71-të për ta rikthyer epërsinë, dhe vetëm tetë minuta më vonë Sorloth e ka vulosur fitoren me një gol të katërt.
Me këtë fitore, Atletico gjendet në kuotën e 63 pikëve dhe qëndron në vendin e tretë në La Liga, duke ruajtur distancën me Barcelonën që kryeson me 70 pikë. Në anën tjetër, Valladolid mbetet në vendin e fundit në renditje me vetëm 16 pikë.
