Me ftesë të kryeministrit të Kosovës, Albin Kurti, një delegacion i rëndësishëm nga Medvegja zhvilloi një takim kyç në Prishtinë, ku në fokus ishte situata alarmante në këtë trevë shqiptare, por njëkohësisht u shtruan kërkesa jetike për këtë trevë të izoluar dhe diskriminuar shqiptare në Serbi.
Në takim morën pjesë Muharrem Salihu, veprimtar dhe afarist i njohur në Itali dhe Evropë, Lulzim Rushiti, vëllai i dëshmorit Florim Rushiti-Kingji, Ajet Duli, veteran i UÇK-së dhe ish i burgosur politik, dhe Linda Shaqiri, aktiviste. Gjithashtu, e pranishme ishte edhe Zv. Ministrja për Kulturë, Rini dhe Sport, Daulina Osmani.
Diskutimet u përqendruan në sfidat jetike për Medvegjën, përfshirë:
• Jetësimin e Rrugës së Kombit deri në Medvegjë
• Hapjen e një pike doganore të kategorisë A për qarkullimin e mallrave dhe kamionëve, duke zëvendësuar pikën aktuale të kategorisë C
• Rolin e KKSH-së në ruajtjen e trashëgimisë kulturore
• Restaurimin e shtëpisë së dëshmorit “Kingji”
• Ndërhyrjen ndërkombëtare për ndalimin e pasivizimit të adresave
Mungesa e një shërbimi kufitar adekuat ka shkatërruar ekonomitë e vogla familjare në Medvegjë dhe, si pasojë, ka lehtësuar politikat e Beogradit për spastrimin e shqiptarëve nga trojet e tyre shekullore.
Medvegja kufizohet me komunat e Kamenicës, Prishtinës dhe Podujevës në Kosovë, dhe nevojitet një pikë doganore e kategorisë A, ashtu siç është në Bujanoc dhe Preshevë, për të mundësuar zhvillimin ekonomik dhe lëvizjen e lirë.
Në përfundim, në shenjë respekti, Kryeministri Kurti u nderua me mirënjohjen “Kingji” nga Medvegja, si një simbol i përkushtimit ndaj çështjes shqiptare në këtë rajon të rrezikuar nga pasivizimi.(INA)
