Basha kërkon zgjidhje si në Maqedoni: Mision monitorimi nga KE

0

Kreu i Partisë Demokratike të Shqipërisë, Lulzim Basha kërkon që zgjidhja e krizës politike në vend të bëhet përmes ndërhyrjes së ndërkombëtarëve.

Nga Sllovenia, ku ishte i ftuar nga Instituti Ndërkombëtar i Studimeve për Lindjen e Mesme dhe Ballkanin, Basha kërkoi nga Komisioni Europian të sjellë një mision monitorimi në Shqipëri për vëzhgimin e reformave dhe sundimit të ligjit.
Basha deklaroi se zgjidhje për Shqipërinë si vend aspirant për në Bashkimin Europian do të ishte nëse do të implementohej ‘Raporti Priebe’, që shërbeu për tejkalimin e një krize serioze të demokracisë dhe sundimit të ligjit në Maqedoni në 2015.

“Monitorimi më efektiv i reformave të sundimit të ligjit në vendet që kërkojnë anëtarësim, mund të arrihet duke u mbështetur në shembullin pozitiv të të ashtuquajturit ‘Raporti Priebe’, i cili tashmë ndihmoi në tejkalimin e një krize serioze të demokracisë dhe sundimit të ligjit në Maqedoni në 2015. Komisioni Europian sapo ka nisur një nismë të re për raportimin e ‘Priebe’, për të monitoruar të gjithë sistemin e sundimit të ligjit në Bosnje dhe Hercegovinë. Unë inkurajoj Komisionin që të iniciojë një mision të tillë monitorimi edhe në Shqipëri”, deklaroi Basha, raporton gazeta “Panorama”.