Basha-Rama drejt paktit të dytë në vjeshtë, ndërkombëtarët vihen në lëvizje

0

Vjeshta pritet të sjellë zhvillime të forta politike në vend. Kryeministri Edi Rama pak ditë më parë i bëri një ftesë publike kreut të PD për të bashkëpunuar. Basha deklaroi se nuk do pranojë aleancë me PS, por la të hapur mundësinë e një diskutimi të dytë. Gazeta ka mësuar se jo vetëm qeveria, por dhe ndërkombëtarët janë duke u përgatitur për një 17 maj të dytë. Dihet që qershori 2019 është shansi i fundit për të hapur negociata me BE dhe nëse nuk plotësohen kushtet, atëherë integrimi do jetë shumë larg. Për këtë arsye do të tentohet një tryezë e dytë bisedimi, në mënyrë që palët të bien dakord me qëllim zbatimin e reformës në drejtësi dhe përmbushjen e të gjitha kushteve të vëna nga BE. Një burim pranë qeverisë i tha gazetës se në lëvizje janë vënë dhe ndërkombëtarët. Në shtator disa personalitete dhe eurodeputetë do vijnë në Tiranë, ku do të tentojnë të bindin Bashën që të bashkëpunojë me Ramën në të mirë të integrimit. Rama vetë tha se do i propozojë opozitës një paketë bashkëpunimi. Mbetet të shihet se çfarë do lëshojë PS, por në vjeshtë nuk përjashtohet mundësia që Rama e Basha të ulen po bashkë.

Frika e LSI

Partia më e rrezikuar nga një takim Rama-Basha është Lëvizja Socialiste për Integrim. Momentalisht ajo është bërë bashkë me PD në opozitë, por nuk ka ende një koalicion zyrtar mes tyre. Basha gjithmonë në media e ka shmangur këtë çështje, duke treguar se nuk e mbështet shumë një gjë të tillë. Vetë deputetët kanë qenë më të drejtpërdrejtë, pasi ka shumë nga ata që thonë se nuk duhet të ketë aleancë me LSI. Po ashtu dhe baza demokrate është rrethuar kategorisht kundër. Por një gjë e tillë ka rritur presionin ndaj LSI. Partia e drejtuar nga Monika Kryemadhi ditët e fundit ka filluar t’i dërgojë mesazhe Bashës. Disa portale të rreshtuara krah LSI dhe Ilir Metës prej ditësh po shkruajnë se PD dhe LSI duhet që të hyjnë bashkë në zgjedhje. Sipas tyre, PD nuk fiton e vetme prandaj nevojitet një aleancë Basha-Kryemadhi në 2019. Por interesant është fakti se Kryemadhi me Metën e Berishën janë duke ushtruar presion që aleanca të zyrtarizohet që në vjeshtën e këtij viti. Por një ngulm i tillë tregon se Meta e Berisha i tremben një pakti të dytë mes Ramës dhe Bashës. Kryeministri e paralajmëroi pak ditë më parë se ka gati një ofertë të dytë për Bashën dhe deklaroi hapur se pema e ullirit që u mboll më 17 maj nëse ujitet fillon sërish të lulëzojë. Një deklaratë e tillë duket se ka shqetësuar LSI, e cila në mënyrë indirekte po i kërkon Bashës që të zyrtarizojnë koalicionin. Opozita ka paralajmëruar një aksion të fortë në shtator dhe PS nga ana tjetër kërkon një tryezë të dytë. Frika e Metës dhe Berishës është se në atë tryezë Basha e Rama mund të bien sërish dakord për t’i bërë “puç’ LSI në zgjedhjet vendore. Një vit më parë falë aleancës Rama-Basha, LSI mori vetëm 19 deputetë. Më 17 maj u ra dakord që të shkohet pa koalicione dhe kjo e dëmtoi jashtë mase LSI e drejtuar nga Ilir Meta. Ftesa e dytë e Ramës e ka shqetësuar sërish Metën, Berishën dhe Kryemadhin dhe kanë filluar të ushtrojnë presion ndaj Bashës që koalicioni mes tyre të zyrtarizohet sa më shpejt./Sot.com.al