Lëvizja BESA, ka reaguar kundër shkarkimit të deputeti Fadil Zendeli nga Komisioni parlamentar për zgjedhje dhe emërime, shkruan gazeta LAJM. Sipas deputetit Bastri Bajrami, shumica parlamentare ka shkarkuar Zendelin për të bërë emërime partiake nëpër institucione.
“Çka po përgatit pushteti meqë kërkon me çdo kusht që të ketë shumicë në komision dhe a po tenton të partizojë institucionet publike, emërimet e të cilëve bëhen në Kuvend. Kush janë propozimet partiake për gjykatën Kushtetuese që dëshirojnë nga dera e vogël t’i kalojnë në Komisionin për zgjedhje dhe emërime. Pushteti aktual në vend që të angazhohet kundër krimit dhe korrupsionit në radhët e veta, të reformojë institucionet e drejtësisë, të punojë në ruajtjen dhe rritjen e mirëqenies së qytetarët, fokusi kryesor i saj është që ku t’i rahatojë kuadrot e veta partiake, familjare dhe si t’i politizojë e partizojë sa më shumë institucionet publike”, tha mes tjerash Bastri Bajrami, deputet i Lëvizjes BESA.
Një ditë më parë, Kuvendi i Maqedonisë së Veriut me 61 vota për shkarkoi anëtarin e Komisionit për zgjedhje dhe emërime Fadil Zendeli.
Shkarkimi i Zendelit nga pozita e anëtarit u kërkua pasi shumica synonte të ketë shumicën e votave në Komisionin për zgjedhje dhe emërime për te zgjedhur anëtaret e rinj të Gjykatës kushtetuese dhe për emërime te tjera.
