Me ndarjen e kulaçit qeveritar në Qeverinë e re, BDI ka marrë një nga institucionet qeveritarecqë peshon shumë fonde dhe para.
Bëhet fjalë për Fondin për Inovacione dhe Zhvillim Teknologjik. Si duket këtë drejtori kjo parti e ka siguruar si kompensim me MEPSO që i kaloi Alternativës si pjesë e koalicionit, përcjell INA.
Drejtor i këtij fondi është emëruar Festim Halili, i njohur së fundi drejtor në disa drejtori, por më parë për një periudhë të shkurtër si zvkryeministër përgjegjës për Marrëveshjen e Ohrit.
Sipas projekt-buxhetit të 2022, ky fond do të ketë në dispozicion gjithsej 18.7 milionë euro.
Sipas planit të qeverisë për mbështetjen e kompanive, Fondi këtë vit do të menaxhojë katër instrumente financiare.
Projektet e planifikuara për t’u zbatuar në vitin 2022 janë përcaktuar në programet e qeverisë, duke përfshirë pagesën e mbështetjes financiare për investime për kompanitë vendase, pagesën e ndihmës shtetërore për investitorët e huaj në zonat e lira TIDZ, mbështetjen për aktivitetet për ndërmarrjet e vogla dhe të mesme, zbatimin e Fondi Global i Ndërsjellë për Zhvillim të Qëndrueshëm, financa e gjelbër për ajër të pastër dhe zbutjen e pasojave të krizës Covid-19, si dhe mbështetje financiare për ndërmarrjet mikro, të vogla dhe të mesme përmes katër instrumenteve mbështetëse në kuadër të Fondit të Inovacionit dhe zhvillimit teknologjik. (INA)
