Grupi i këshilltarëve të BDI-së në Këshillin e komunës së Kumanovës ka reaguar lidhur me pranimin e 8 maqedonasve të deklaruar si shqiptarë në sektorë të ndryshëm të Komunës së Kumanovës gjatë një konkursi të shpallur kohë më parë në Komunën e Kumanovës.
“Veprimi i fundit i kryetarit të komunës së Kumanovës Maksim Dimitrievski, i cili në konkursin e fundit ka punësuar 8 maqedonas, të deklaruar si shqiptarë në vendet e parapara për shqiptarë nuk është fare për t’u habitur, sepse është vetëm vazhdimësi e veprimeve dhe politikave nacionaliste që ai i ka ndaj shqiptarëve. Po habit fakti se si ata shqiptarë që janë në koalicion me të gjegjësisht, Aleanca dhe Alternativa, heshtin dhe e përmbajnë në veprimet e tilla, deri në atë masë që janë të gatshëm të shkelin mbi çdo vlerë dhe të mirë për interesa të ngushta politike dhe personale. Kumanova dhe kumanovarët me të vërtetë nuk e meritojnë një nëpërkëmbje dhe nënçmim të tillë, e sidomos kur nënçmimi i tillë miratohet dhe përkrahet edhe nga disa “shqiptarë”, gjegjësisht Alternativa dhe Aleanca, të cilët supozohet se duhet ta mbrojnë atë.”, – tha këshilltarja komunale nga radhët e BDI-së, Arta Mehmeti Ademi.
Ndryshe, të gjithë të punësuarit janë të shpërndarë në sektore të ndryshme edhe atë në Sektorin për punë komunale, infrastrukturë, trafik dhe mbrojtje të mjedisit, bashkëpunëtor për kulturë, inspektor i trafikut, referent i pavarur për përgatitjen e punëve e administratës në Departamentin për bashkëpunim ndërkombëtar dhe eurointegrime.