Zhvillimet e fundit të lidhura me agjendën antievropiane në rajon janë tregues i qartë se është në lëvizje një projekt i organizuar, i mbështetur nga qendra të fuqishme proruse dhe prokineze, me qëllim rrëzimin e rendit demokratik në Ballkan dhe ndalimin e procesit të integrimit evropian.
Bëhet fjalë për një projekt të mirëorganizuar dhe të mbështetur politikisht, mediatikisht dhe financiarisht nga forca anti-perëndimore, të cilat duan ta izolojnë rajonin dhe ta kthejnë në një zonë nën ndikimin e autokracive lindore.
Në këtë skenar të rrezikshëm, për fat të keq, pjesëmarrës aktivë janë bërë edhe disa fraksione shqiptare në pushtetin aktual, vasalë të përzgjedhur dhe të kontrolluar nga Mickoski përmes Prokurorisë, me qëllim fshehjen e aferave kriminale që rëndojnë mbi ta.
Këta “partnerë shqiptarë”, të paaftë dhe të korruptuar, nuk mund të jenë mbrojtje legjitime për një projekt kaq të rrezikshëm, antishqiptar dhe antievropian.
E themi qartë: Shqiptarët nuk do të lejojnë kurrë që shteti të bëhet aleat i Dodikut, si instrument për të sabotuar Brukselin në rajon.
Nuk do të pranojmë të bëhemi peng i një agjende që do të çmontojë barazinë, demokracinë dhe perspektivën evropiane të shtetit tonë.
