Peter Stano, zëdhënësi i Komisionit Europian, ka komentuar rastin e pretenduar të torturimit dhe rrëmbimit të politikanit opozitar serb, Nikola Sandulović, duke thënë se ata janë në kontakt me Beogradin, por kanë nevojë për faktet e plota.
Kur u pyet nëse Komisioni do të ndërmerrte ndonjë veprim kundër Serbisë në lidhje me situatën, Stano nuk përgjigj drejtpërdrejt. Në vend të kësaj, ai i tha Euronews Albania, “kemi parë raporte lidhur me arrestimin pretenduar dhe keqtrajtimin e Sandulović”.
Ai shtoi se Komisioni po ndjek nga afër rastin dhe është në kontakt me “autoritetet dhe palët e përfshira”. Megjithatë, është “e rëndësishme të ketë njohuri të plotë rreth këtij rasti”.
“Ne presim që të respektohen të drejtat e të gjithë qytetarëve. Çdo arrestim duhet të bazohet në dyshimin e arsyeshëm për kryerjen e një shkeljeje dhe çdo akuzë e besueshme për dhunë duhet të ndiqet nga autoritetet përkatëse,” tha Stano.
Sandulović u arrestua në shtëpinë e tij më 3 janar nga agjentë të Agjencisë për Sigurinë dhe Informacionin (BIA), pasi kishte kërkuar falje për krimet e kryera nga Serbia kundër shqiptarëve etnikë gjatë luftës për pavarësi të Kosovës në vitin 1998-99.
Sipas postimeve në rrjetet sociale, nuk kishte asnjë lajm për Sandulović, deri sa ai u gjet në repartin e kujdesit intensiv në spitalin ushtarak VMA në Beograd më 4 janar.
Ai mbetet në burg dhe aktualisht i është mohuar qasja në kujdesin mjekësor të pavarur. Ekipi i tij ligjor ka paraqitur një rast urgjent te Komiteti i Kombeve të Bashkuara Kundër Torturës, duke kërkuar lirimin e menjëhershëm, mbrojtjen për të dhe familjen e tij, dhe tërheqjen e të gjitha akuzave kundër tij.
