Ish-ambasadori i SHBA-ve në Shkup, Xhes Bejli thotë se ndryshimet kushtetuese janë një zgjidhje e qartë për veton bullgare, por se do të jetë zhgënjim nëse në të ardhmen do të ketë një veto të re që do të bllokojë rrugën drejt Bashkimit Evropian.
Bejli në një intervistë për “Zërin e Amerikës” në gjuhën maqedonase, ka theksuar se është optimist se vendi do të hyjë në BE, por se nuk mund të thotë se kur do të ndodhë.
“Mendoj se SHBA do të zhgënjeheshin nëse do të ndodhnin veprime të mëtejshme të kësaj natyre. Ndërsa kaloni procesin dhe hapni kapitujt, disa vende do të duan të sigurohen që vetë kriteret janë përmbushur, kështu që do të ketë pyetje të tjera gjatë rrugës. Dhe kështu mendoj se është e rëndësishme që çdo çështje të mos shihet si një çështje jolegjitime midis shteteve anëtare, sepse kjo është pjesë e procesit. Do të jetë një proces i gjatë për të kaluar nëpër disa nga ata kapituj, veçanërisht për sundimin e ligjit. Vendi do të jetë nën mbikëqyrje të madhe, kjo është e qartë, ashtu si Shqipëria dhe të tjerët. Por mendoj se jam optimist. Unë mendoj se njerëzit do ta shohin këtë të ndodhë. Por nuk mund të them se kur”, tha Bejli.
Ai thotë se Marrëveshja e Prespës, sikurse edhe amendamentet kushtetuese tani, është kritikuar në fillim, por që askush nuk e konteston më rezultatin pozitiv të saj.
I pyetur nëse marrëveshja e Prespës ishte një zhgënjim për perspektivën evropiane, ai theksoi se qëllimi i Prespës ishte në radhë të parë zgjidhja e problemit me Greqinë dhe bllokada e saj më shumë për NATO-n. Ai thotë se ndryshimet kushtetuese do ta forcojnë pozitën e shtetit, ndërsa problemi i Bullgarisë është se nuk e njeh pakicën maqedonase përkundër vendimeve të Gjykatës në Strasburg.
Sipas tij, nëse vendi nuk i fillon negociatat tani, nuk është e qartë se sa do të vonohet anëtarësimi në BE.
Tensionet ndërmjet Kosovës dhe Serbisë janë shkak për shqetësim dhe mund të nxisin problemet e sigurisë, beson Bejli, por anëtarësimi i Maqedonisë në NATO “e bën atë situatë jo aq akute sa mund të ishte ndryshe”. (INA)
