Belgjikë: Shqiptarja vlerësohet si regjisore në Festivalin e Filmit në Bruksel

Javën e kaluar u mbajt Festivali i Filmit të Shkurtër në Bruksel 2022, ose BSFF i 25-të që u zhvillua nga 20-30 prill 2022 në Bruksel, Belgjikë ka mes listës së fituesve edhe një artiste shqiptare.

Flonja Kodheli në këtë kompeticion europian u prezantua edhe si regjisore dhe skenariste me produskionin e metrazhit të shkurtër “Ka me kalu”.

Filmi u vlerësua me çmimin “Be TV”, çka i ka hapur rrugën artistes për të shfaqur filmin në televizion këtë vjeshtë.

Me regji të Flonja Kodhelit, “Ka Me Kalu” tregon historinë e Stelës (interpretuar nga Flonja Kodheli), e cila kthehet nga Shqipëria në Bruksel për të marrë pjesë në varrimin e gjyshes. Ajo vëren se nëna e saj është e pushtuar nga frika dhe jo nga pikëllimi. Sjellja e saj duket konfuze, absurde dhe madje paranoike. Trauma e rishfaqur nga e kaluara pushton jetën e tyre. Në role Ilire Vinca Çelaj, Mathilde Rault dhe Serge Hologne.

Flonja Kodheli është një aktore, muzikante, pianiste dhe kompozitore, u largua me familjen nga Shqipëria në vitin 1993 dhe u vendos në Belgjikë. Ka interpretuar në filma si “Bota” (2014 Shqipëri), “Amsterdam Express” (2014 Shqipëri), “Il contagio” (2017 Itali), “Helvetica “(2019 Zvicër, Belgjikë), “Exil” (2020, Gjermani, Belgjikë, Kosovë) etj.