Mesfushori i Real Madridit, Jude Bellingham, ka konfirmuar se do të operohet për një problem kronik në shpatull, pas përfundimit të Kupës së Botës për Klube. Anglezi ka vuajtur që prej nëntorit nga një zhvendosje e nyjës në një ndeshje të La Ligës dhe ka luajtur me mbajtëse mbrojtëse gjatë kësaj kohe.
“Kam arritur në një pikë ku nuk mundem më. Do ta bëj ndërhyrjen disa ditë pas finales,” tha Bellingham për DAZN, pas fitores 3-1 ndaj Pachucas.
Operacioni pritet ta mbajë jashtë fushës deri në 12 javë, çka mund ta detyrojë të humbasë fillimin e sezonit të ri në La Liga dhe ndeshjet e Anglisë në shtator ndaj Andorrës dhe Serbisë.
Në ndeshjen ndaj Pachucas, Bellingham shënoi një gol, duke komentuar edhe me humor rivalitetin me të vëllanë, Jobe Bellingham, i cili një ditë më parë kishte shënuar për Borussia Dortmund: “Tani jemi një me një, do të shohim si do shkojë pjesa tjetër e turneut.”
